វប្បធម៌នៃការចែករំលែកដោយ «អ្នកចេះច្រើនចូលរួមបង្រៀនអ្នកចេះតិច» រួមជាមួយនឹងសាមគ្គីភាពយ៉ាងរឹងមាំរបស់មន្ត្រី ត្រូវបានចាត់ទុកជាកាតាលីករដ៏សំខាន់ ដែលជួយឱ្យមន្ទីរព័ត៌មានខេត្តកណ្តាល សម្រេចបាននូវលទ្ធផលការងារយ៉ាងធំធេងក្នុងរយៈពេល ៩ខែ ឆ្នាំ២០២៦ នេះ។ ការគូសបញ្ជាក់នេះ ធ្វើឡើងដោយ ឯកឧត្តម សាន សំបូរី អនុរដ្ឋលេខាធិការក្រសួងព័ត៌មាន ក្នុងពិធីផ្សព្វផ្សាយលទ្ធផលការងាររយៈពេល ៩ខែ និងទិសដៅអនុវត្តបន្តរបស់មន្ទីរព័ត៌មានខេត្តកណ្តាល នៅព្រឹកថ្ងៃទី៣០ ខែកញ្ញា ឆ្នាំ២០២៦នេះ។ ឯកឧត្តមអនុរដ្ឋលេខាធិការ ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរួមគ្នានេះ ដោយបានជំរុញបន្ថែមឱ្យមន្ទីរបន្តបញ្ជូនមន្ត្រីទៅចូលរួមវគ្គបណ្តុះបណ្តាលនានាដែលក្រសួងបានបង្កើតឡើង ដើម្បីបំប៉នសមត្ថភាពជាប្រចាំ។ ទន្ទឹមនឹងនេះ ឯកឧត្តមបានក្រើនរំលឹកដល់មន្ត្រីទាំងអស់ មិនត្រូវសម្ងំរស់នៅក្នុង Comfort zone ពេកនោះទេ គឺត្រូវខិតខំរត់ឱ្យទាន់បច្ចេកវិទ្យាថ្មីៗ ជាពិសេសការចាប់យកចំណេះដឹងផ្នែកបញ្ញាសិប្បនិម្មិត រឺហៅថា AI ដើម្បីយកមកបម្រើការងារព័ត៌មានឱ្យកាន់តែភាពល្អ និងទាក់ទាញ។ គួរបញ្ជាក់អោយដឹងដែរថា ចំពោះផ្លែផ្កានៃការពង្រឹងសមត្ថភាព និងសាមគ្គីភាពនេះ ត្រូវបានឆ្លុះបញ្ចាំងតាមរយៈរបាយការណ៍ដែលបង្ហាញដោយ លោក ចាប វន្នី ប្រធានមន្ទីរព័ត៌មានខេត្តកណ្ដាល ដែលបានបង្ហាញថា ត្រឹមរយៈពេល ៩ខែក្នុងឆ្នាំ២០២៦នេះ មន្ទីរផលិតព័ត៌មានបានចំនួន ៧ ៩៨៤ អត្ថបទនិងរូបភាព។ មិនត្រឹមតែប៉ុណ្ណោះ ការចែកចាយផ្សព្វផ្សាយតាមគ្រប់ទម្រង់ រួមទាំងទូរទស្សន៍ វិទ្យុ និងបណ្តាញសង្គម សម្រេចបានរហូតដល់ ១៤២ ០៩៨ លើក។ លើសពីនេះ ក្រុមការងារក៏បានផលិតវីដេអូព័ត៌មានខ្លី និងកម្មវិធីអប់រំផ្សេងៗបានចំនួន ២ ៣៨៦ វីដេអូ ព្រមទាំងផលិតបទយកការណ៍អំពីសក្តានុពលខេត្តបានចំនួន ៤១ ស្តីពីព្រឹត្តិការណ៍សំខាន់ៗ។ ក្រៅពីការផលិត យន្តការតាមដាន និងឆ្លើយតបព័ត៌មាន ក៏ត្រូវបានអនុវត្តយ៉ាងសកម្មស្របតាមការណែនាំរបស់ថ្នាក់ដឹកនាំ ដែលតម្រូវឱ្យធ្វើការងារនេះឱ្យដូច «ភ្លៀងរលឹម» ទាន់ពេលវេលា និងត្រូវហេតុការណ៍ ដើម្បីទប់ស្កាត់ការបំភាន់ បំផ្លៃ បំផ្លើស និងព័ត៌មានក្លែងក្លាយ។